Ibtida-e-ishq hai rota hai kya-Urdu ghazal by Meer Taqi Meer

ibtida-e-ishq hai rota hai kya
age age dekhiye hota hai kya

qafile main subah k ik shor hai
yani gafil ham chale sota hai kya

sabz hoti hi nahin ye sarzamin
tukhm-e-khwahish dil main tu bota hai kya

ye nishan-e-ishq hain jate nahin
dag chati k abas dhota hai kya

gairat-e-yusuf hai ye waqt-e-aziz
'Mir' is ko rayegan khota hai kya