Nasir Kazmi famous Urdu Ghazal shayari-Nasir ye wafa nahin junuun hai

Be minnat-e-Khizr-e-raah rahnaa
manzuur hamen tabaah rahnaa

yaaroN ko nasiib sar-faraazii
mujhko terii gard-e-raah rahnaa

dil aik ajiib ghar hai pyaare
is ghar men bhii gaah-gaah rahnaa

gar yuNhii rahii diloN kii ranzishen
mushkil hai baham nibaah rahnaa

bhar aayegii aankh bhii kisii din
Khaalii nahiiN sarf-e-aah rahnaa

 “Nasir” ye wafa nahin junuun hai
apnaa bhii na Khair-Khvaah rahnaa !