Ahmad faraz Ghazal-Suna hai loog usse ankh bhar k dekhte hain

 

 

Suna hai loog usse ankh bhar k dekhte hain

So us k shehar main kuch din thehar k dekhte hain

Suna hai rabt hai us ko kharab halon se

So apne aap ko barbaad kar k dekhte hain

Suna hai dard ki gahak hai chasm-e-nazuk us ki

So hum bhi uss ki gali se guzar k dekhte hain

Suna hai us ko bhi hai sher-e-shayari se shagaaf

So hum bhi moujze apne hunar k dekhte hain

Suna hai bole to batoon se phool jharte hain

Ye Baat hai to chalo baat kar k dekhte hain

Suna hai raat usse chand takta rehta hai

Sitare baam-e-falak se utar k dekhte hain

Suna hai hasher hain us ki ghazal si aankhen

Suna hai us ko hiran dasht bhar k dekhte hain

Suna hai din ko usse titliyan satati hain

Suna hai raat ko jugnu thahar k dekhte hain

Suna hai us ki siyah chashmagi qayamat hai

So us ko surma faroosh ankh bhar k dekhte hain

Suna hai us k labon se gulaab jalte hain

So hum bahaar pe ilzaam dhar k dekhte hain

Suna hai aaiyna tamsaal hai jabeen us ki

Jo saada dil hain usse ban sanwar k dekhte hain

Suna hai jab se hamail hain us ki garden main

Mizaaj aur hi laal-o-gauhar k dekhte hain

Suna hai chashm-e-tasswur se dasht-e-imkaan main

Palang zaaviya us ki kamar k dekhte hain

Suna hai us k badan k taraash aise hain

K phool apni qabayen katar k dekhte hain

Bus ik nazar se lut’ta hai qafila dil ka

So rahrawan-e-tammana bhi dhar k dekhte hain

Suna hai us k shabistan se mutasil hai bahisht

Makeen udher k bhi jalwe idher k dekhte hain

Ruke to gardishen us ka tawaaf karti hain

Chale to us ko zamane thehar k dekhte hain

Kise naseeb k be perahan usse dekhe

Kabhi kabhi dar-o-dewaar ghar k dekhte hain

Kahaniyan hi sahi sab mughalbe hi sahi

Agar wo khuab hai to tabeer kar k dekhte hain

Ab us k shehar main thehren k kooch kar jayen

“FARAZ” aao sitare safar k dekhte hain